Денеска во просториите на Општина Кисела Вода се одржа средба на службите на Градот Скопје и на јавните претпријатија на Град Скопје со урбаните и месните заедници од Општина Кисела Вода, каде присуствуваа градоначалниците на градот Скопје и Општина Кисела Вода, Коце Трајановски и Билјана Беличанец-Алексиќ.

На средбата присуствуваа и претседателот на Советот на Општина Кисела Вода, Трајче Донев, директорите на јавните претпријатија на Градот Скопје и надлежните на пунктовите во Општина Кисела Вода, раководителите на секторите на администрацијата на Градот Скопје и Општина Кисела Вода, како и претставници од сите урбани и месни заедници од Општина Кисела Вода.

– “Овие средби се одлична можност за претставници на урбаните и месните заедници да дадат оцена за работата на јавните претпријатија, да ни укажат за некои недостатоци во нивната работа и да дадат предлози за нивно надминување. Овој состанок ќе биде искористен за координација помеѓу Градот Скопје, јавните претпријатија, Општина Кисела Вода и урбаните и месните заедници од општина Кисела Вода и изготвување на акционен план за работа на јавните претпријатија за оваа година”, кажа градоначалникот Трајановски.

Како најважни проекти коишто Градот Скопје ќе ги реализира на територијата на Општина Кисела Вода во наредниве 4 години, Трајановски ги наведе продолжувањето на процесот на проширувањето и реконструкцијата на булеварот “Борис Трајковски” во насока на населеното место Драчево, продолжувањето на булеварот “Србија” до улица “Христо Татарчев”, проширување и реконструкција на улица “Павел Шатев” и многу други.

Градоначалникот на Општина Кисела Вода, Билјана Беличанец-Алексиќ ја поздрави оваа активност, потенцирајќи дека системот на месните и урбаните заедници во Кисела Вода е ефикасен и одлично функционира на терен, од каде во дослух со граѓаните секојдневно се добиваат нивните забелешки.

-“Се трудиме да го пратиме темпото на потребите на граѓаните и веднаш да излеземе на терен и да ги санираме, а она што е надлежност на Град Скопје, на денешниот состанок ќе направиме акционен план за да го санираме во тековната година. Сепак се работи за една од најстарите општини, за една од најстарите инфраструктури, а граѓаните најмногу ги засега фекалната и атмосферската канализација. Очекувам дека овој состанок ќе биде продуктивен и ќе стапиме во акција” – истакна Билјана Беличанец Алексиќ.

На средбата, директорите на јавните претпријатија реферираа за нивните активности на територијата на општината, а претставниците на урбаните и месни заедници од Општина Кисела Вода упатија повеќе прашања и сугестии за подобрување на услугите кои ги нудат јавните градски претпријатија.