Новите шампиони во женска кошарка во Македонија, Бадел 1862, денес беа на прием кај градоначалникот на Кисела Вода. По минатонеделниот успех каде на гостински терен во Македонска Каменица, спортистките од најтрофејниот женски кошаркарски клуб во Македонија повторно запишаа победа и стигнаа до 14-тата вкупна освоена титула.

 -Големo e задоволството што токму државниот првак во женска кошарка е екипа од Општина Кисела Вода. Покрај, личниот и екипниот успех, девојките даваат голем придонес во развојот на спортот на територија на општината, но и на Македонија. Посветеноста, дисциплината, постојаната работа на самоусовршување и тримфот како завршница на оваа нивна приказна, се вредностите кои треба да ги развиваат сите млади лица и поради кои, тие ги заслужуваат сите почести. Денес им даваме благодарница за она што го направија за Кисела Вода и за сите млади и талентирани спортисти кои во нив се огледуваат. Дополнително, ја зголемивме сумата која Општина Кисела Вода ја доделува како финансиска поддршка на спортските клубови, кои даваат посебен придонес во афирмацијата на спортот во овој дел на градот. Од Општина Кисела Вода тие ќе добијат субвенција во износ од 250 000,00 денари, што е за 50.000 денари повисока сума од ланската. Им честитам и ним и на нивниот тим менаџер Љупчо Павловски, како и и на тренерот Перо Стамески и им посакувам да го задржат пехарот и во наредните години. На поддршката од Општината и од мене, како градоначалник можат секогаш да сметаат-изјави градоначалникот Ѓорѓиевски, кој им ја врачи благодарницата, а од нив доби медал.