Се известуваат жителите на Општина Кисела Вода дека од 01.01.2018 година стапи на сила Законот за изменување на законот за постапување со бесправно изградени објекти (Службен весник на Република Македонија 190/17).
Сите лица кои се иматели на бесправно изградени објекти, кои ги изградиле заклучно со 3 март 2011 година, а на кои се изведени градежните и инсталатерските работи во целост и истите претставуваат градежна функционална целина, можат да поднесат барање за утврдување на правен статус на бесправно изграден објект најдоцна до 31 декември 2018 година, до кога е потребно да достават и геодетски елаборат за утврдување на фактичка состојба на бесправен објект.
Лицата кои веќе еднаш имале поднесено барање за утврдување на правен статус на бесправно изграден објект, а истото им било одбиено со решение заради некомплетна документација (ако не доставиле геодетски елаборат за утврдување на фактичка состојба на бесправен објект во пропишаниот рок), можат повторно да поднесат барање за утврдување на правен статус на бесправно изграден објект најдоцна до 30 јуни 2018 година, до кога е потребно да достават и геодетски елаборат за утврдување на фактичка состојба на бесправен објект.
Барањето за утврдување на правен статус на бесправен објект се поднесува на посебен образец, кој барателите можат да го подигнат од Едношалтерскиот систем на Општина Кисела Вода. Барателите можат да поднесат барање за утврдување на правен статус секој работен ден од 8:30 до 16:30 часот. Воедно, двата типа на барања можете да ги најдете и на следниве линкови :
1. Барање за утврдување на правен статус на бесправно изградени објекти од локално значење
2. Ново барање по претходно одбиено барање поради некомплетна документација
Исто така, се известуваат сите лица кои поднеле барање за утврдување на правен статус на бесправно изграден објект во периодот од 21 декември 2015 година до 31 март 2016 година, дека е продожен рокот за доставување на геодетски елаборат за утврдување на фактичка состојба на бесправен објект, најдоцна до 30 јуни 2018 година.
